اوت 15, 2009 at 8:30 ق.ظ. بیان دیدگاه

٢٠٠٧ ساڵێک پڕ لە ئاڵۆزى و ناڕوونى سیاسیى!
ئەلف کاف

هەمووساڵێک لەسەرەتای هاتنی ساڵی نوێ شار دەڕازێتەوە، سەدەها گڵۆپ دائەگیرسێنن ئەوگڵۆپانەی لە دڵۆپی خوێنی ئێمەدەچێ، شاردەکرێتە چراخان و کەچی ماڵەکانمان تاریکستانە، هەمووساڵێک بەکۆمەڵێک ئاواتەوە پێ دەنێینە ساڵی تازە کەچی خەمەکانی ساڵی ڕابردوومان هەر لەئەستۆیە و لەیادی ناکەین، 16 ساڵە چەند وتەیەکی دووبارەمان بۆ دەڵێنەوە گوایە ساڵی نوێ کارەبا باش دەبێت سوتەمەنیمان بۆدابین دەکەن نرخی کاڵاکان دادەبەزێنن مووچەی فەرمانبەران زیاددەکرێ….، کەچی لە درۆودەلەسە هیچی ترنیە، ئەوەتانێ پێ دەنێینە ساڵی نوێ کەچی کێشەکانمان لەزیادبوونە، بابەنوئێل بە فڕۆکەی تورکی لە جیاتی بوکەڵەی مناڵان جۆرەها چەکی ژهراویمان لەسەر تاقی دەکاتەوە، ئەو ئەمریکایەی کە ئێمە بەدۆستی خۆمانمان دەزانی کەچی ئەو هاوپەیمانیتی نازانێت و رێگە بە هێزەکانی تورک دەدات دێهاتەکانی بناری قەندیل وێران بکرێن وهیچ کەسێک نایەتە هانامان، خانوومان بەسەر دادەروخێنن ئاژەڵەکانمان دەسوتێنن دەیانەوێت ناسنامەی کوردایەتیمان بسڕنەوە کەس نەهات بەدەنگمانەوە، ئەی سەرکردایەتی کورد کوا هەڵوێستان، ئێوە ئاگادارنین هێزەکانی ئەتاتۆرک خانویان بەسەر داڕوخاندین ڕەزەکانیان سوتاندین کوا هەڵوێستان، ئەی ئێوەنەبوون دەتانگوت مەگەر سوپای تورک بەسەر لاشەی ئێمەدا بڕوات، بەڕاستی زۆر سەیرە ئائەمە هەڵوێستان بوو؟ کوا کامیرەکانی کەناڵەکانی کوردسات و کوردستان تیڤی و زاگیرۆس و… ئەوانی تر ئەی بۆ ئەم دیمەنانەتان بۆ بەرچاوی جیهان پەخش نەکرد وێنەی ئاژەڵەکاناتان پەخش نەکرد کە لە خوێنی خۆیان گەوزێنرابوون بۆ وێنەی ئەو دایکەتان پەخش نەکرد کە شەهید کرابوو، کوا مافی مرۆڤ کوا مرۆڤ دۆستەکان هیچ کەسێک نەهاتە دەنگ، خەریکە هەڵەبجە دووبارە دەبێتەوە نازانم ئێمە بۆ ئەوەندەخۆش باوەڕین بەچەند وتەیەکی بریقەدار باوەڕدەکەین، باوکە تەمەن 75 ساڵیەکەم لەکاتی هەڵبژاردن بەخۆی و گۆپاڵەکەی دەستی ملی ڕێگای گرتەبەر و دەیگوتە خەڵکینە ئەم دەنگدانە چارەنووسی نەوەکانمان دیاری دەکات هەردەبێت دەنگبدەین، کاتێک پەنجە لەرزۆکەکەی لەناو قووتوی مەرەکەبەکەنا وای دەزانی شانەی هەنگوینی دۆزیوەتەوە زۆر بەپەرۆشەوە پەنجەکەی بۆ ئاسمان بەرزکردبۆوە، کەچی ئێستاش ناگاتە کاتژمێر 10 ی شەو دەبێت زۆپەکەی بەردەمی بکوژێنێتەوە و خۆی بکات بە ژێر بەتانیەکەی لەبەر بێ نەوتی، ئێستاش دەیڵێتەوە ئەوانە شوانی کوردنین کورد بێ شوانە و ئەوانە لەسەر حیسابی ئەم میللەتە کۆشکوتەلار بونیاد دەنێنن، 16 ساڵە درۆمان لەگەڵ دەکەن، چەندان سوپەرمارکێت و بازاڕی هاوچەرخ و…. دروستکرد کەچی ناتوانن بازاڕێکی بەناو ئازاد کۆنتڕۆل بکەن، یادی چی بکەینەوە من لە ماڵەوە کارەبام نەبێت سوتەمەنیم نەبێت ئەوەی خزمەتگوزاریە نەم بێت بەچ بۆنەیەک یادی سەری ساڵ بکەمەوە، ئەوکەسە یادی ئەم بۆنەیە دەکاتەوە کە لەوپەڕی خۆش گوزەرانی دابێت حکومەت خزمەتگوزاری پێشکەش کردبێ ژیانی دابین کردبێ، من لەماڵەکەی خۆم بەرمیلێک نەوتم نەبێت یادی چی بکەمەوە، کاتێک خاوەن مۆلیدە لەدەرگادەدات و داوای پارەی کارەبا دەکات من یادی چی بکەمەوە، بەبۆنەی گەڕانەوەی کەرکوک یان لەشکرکێشی سوپای تورکیا بۆسەر خاکی هەرێمی کوردستان ئاهەنگ بگێڕین، سەدان حەیف و مەخابن ئێمەخاوەنی 111 ئەندام پەڕلەمانین 400 بەڕێوەبەری گشی مان هەبێت وەزارەتی پلان دانانمان هەبیت کەچی حکومەتێکی بێ پلان بێت، 17% پارەی نەوت بۆ سێ پارێزگابێت کەچی میللەت لەم دۆزەخەدابێت، بەڵام نائومێدنابین هەموو تاریکای دوونیا ناتوانێ ڕوناکی مۆمێک بشارێتەوە، هەرچەند شەوتاریک دابێت هەر رۆژدبێتەوە.

ئێران و ئەمەریکا .. کوردستان و بەسرە

ڕەشید ئەلخەیون وەرگێرانى: دیاری عەلى

لە دالانە تاریکەکانى ڕامیاریدا، ئەوە بە دوور نازانرێت کە ئێران لە کاتى وتو وێژەکانى لەگەلڕ ئەمریکادا داواى بەسرە بکات لە بەرامبەر دەست هەڵگرتنى لە بەشەکانى تر لە عێراق و ڕاگرتنى کۆمەکى میلیشیاکان سەرجەم مەزهەب و نەژادەکان. ئەوە بۆ جارى دووەمە ئێران و ئەمریکا لەسەر خاکى عێراق وتو وێژ دەکەن بە بەژدارى لایەنى عێراقى گوێگر و تەماشاکەر، جێى مەترسیە کە بێدەنگى عێراق و زیادەڕۆیى ئەمریکا بێتە هۆى ئەوەى بەسر بخرێتە سەر خۆزستان، دەمێکە بەسرەش بۆ ئەم کارە ئامادە دەکرێت، زمانى فارسى لە شەقام و زانکۆکانیدا باوە و هیچ سنورێک لە نێوان کەنارى خۆرهەڵات و خۆرئاواى شەتولعەرەبدا نەماوە و ئیتلاعاتى ئێرانیش فەرمانى لە ناوبردن و دانانى ئەم و ئەو ئەدات، بەسرە پڕِ بووە لە کتێبگەلێک کە مۆرى خانەکانى پەخشى ئێرانى لە سەرە،ئەم کارەش هیچ پەیوەندیەکى بە مەزهەبگەراییەوە نیە، چونکە یەکەمین قوربانى شیعەکانى باشوورن، ئەوەندەى پەیوەندى بە نەخشە و ئەزمونە کۆنەکانەوە هەیە.

هێشتا ئەزمونى وازهێنانى دەوڵەتى بەعس لە ساڵى (1975) دا لە خاک و ئاوى بەسرە بۆ ئێران لە بەرچاوە، لەبەرامبەر پاکتاوکردنى شۆڕشى کورد لە چیاکاندا، هێشتا ئەزموونى عەرەبستانیش لەبەرچاوە چونکە بە پێى بەندەکانى پەیمانامەى ئەرز ڕۆمى دووەم ساڵى (1847)ى نێوان دەوڵەتى سەفەوى و عوسمانى دەبێت موحەمەرە (خۆزستان) و بەندەرەکەى و کەنارەکانى خۆرهەڵاتى شەتولعەرەب بدرێت بە ئێران، لە بەرامبەر وازهێنانى لە دەستێوەردانى لە سلێمانى ( ئەلعەزاوى عێراق لە نێوان دوو داگیرکردندا) و کەمکردنەوەى فشارەکانى لە سەر شارەزوورى کوردستانى عێراق.

عەرەبستانیش بە پێى ئیبراهیم سەبغەتولڵا (لە 1882 مردووە )لە نێوان سنورى بەسرە و عێراقدا بووە، لەکاتێکدا عوسمانیەکان حیسابى خۆیان لەگەڵ میرنشینى بابان و شارەزووردا یەکلایى کردۆتەوە، سەفەویەکان نەیان توانیوە کە هەمان شت لەگەلڕ خێڵەکانى ئەحواز و عەرەبستاندا بکەن و لە کۆتایدا بنەماڵەى شێخ خەزعەل (کە لە 1936 مردووە)، توانیویەتى بیکاتە میرنشین. لەگەڵ دۆزینەوەى نەوت لە ساڵى (1908) دا، چاو بڕینە سامانى ناوچەکە زیاتر بووە، کاتێک (شێخ خەزعەل) خۆى کاندید کردووە بۆ عەرشى عێراق و وتویەتى ئەو عێراقیە و لەسەر کەنارى شەتولعەرەب لە دایک بووە و لە کاندیدەکانى تر شایستەى ئەو پۆستەیە (ئەلعەتیە، عێراق لەساڵانى 1908-1921 لەبەڵگەنامەیەکى بەریتانیەوە) ، بۆ ئەم مەبەستەش دۆستى خۆى و پارێزەرى گەنجینەى بەسرە و سەرەک وەزیرانى دواترى عێراق (مزاحم ئەلپاچەچى)(کە لە ساڵى 1982 مردووە)، هەلبژاردووە تا سەرپەرشتى هەڵمەتى پڕوپاگەندەکەى بکات، ئەمەش ئەوە دەردەخات کە تایفەگەرى ڕێى لە پاچەچى سوننى نەگرتووە کە پاڵپشتى شێخ خەزعەلى شیعە بکات، یا شێخ سالم ئەلخەیونى شیعە پاڵپشتى خۆ کاندیدکردنى تالیب ئەلنەقیبى سوننى بکات (ئەلعومەرى،چیرۆکى ڕامیارى) بەڵام ئینگلیزەکان ویستویانە شتەکان لەگەلڕ شاى نوێى ئێران ڕەزا پەهلەویدا یەکلایى بکەنەوە کە خۆى لە ئەفسەرێکەوە بەرزکردۆتەوە بۆ شا، بۆیە ئەحوازیان بە دیارى داوەتێ و لەو لاشەوە شێخ خەزغەلیان گرتووە (1925) و بەمە کۆتایى هاتووە.
کاتێک مەزاحیم ئەلپاچەچى داواى کردووە سەردانى هاوڕێکەى بکات، دەسەڵاتدارانى ئێرانى ئەم داوایەیان ڕەتکردۆتەوە و وتراوە ، ئەگەر شێخ خەزعەل بێتە پاشاى عێراق، ئەوا میرنشینى عەربستانى پڕ نەوت دەبێتە بەشێک لە عێراق و بەمەش ڕێرەوى مێژوو هاوسەنگى ستراتیژیى لە سەرجەم ناوچەکەدا دەگوڕێت ( مزاحم ئەاپاچەچى، ژیاننامەى ڕامیارى). ئینگلیز ئاوایان لە شێخ عەزعەلى کردووە، ئەگەرچى پەوەندیى لەگەڵیان زۆر باش بووە هەروەک چۆن سەرکردە عیراقیەکانى ئێستاى ناوچەى سەوز پەیوەندیان لەگەڵ ئەمریکیەکان باشە، بەڵام سیاسەتى بەرژەوەندى کوا بەڵینى لەخۆ گرتووە ..!

دواى ئەو ڕووداوانەى مێژوو و ئامادەکاریە حیزیبیەکانى بەسرە بەرەو ئێران ئایا ناکرێت کە ڕێکەوتنامەى شومى ساڵى 1975 و دەستبەردار بوون لە عەرەبستان دووبارە بێتەوە، پێویست ناکات ئاخوندێک بە عەمامەکەیەوە بێت تا دەست بەسەر بەسرەدا بگرێت بە ڕیکەوتن لە گەلڕ ئەمریکادا، تەنها ئەوندە نەبێت کە ئێران ئەمریکا بە شەیتانى گەورە نەزانێت و ئەویش ئێران بە لانکى تیرۆر دانەنێت، پاشانیش هەنگاوەکانى لابردنى حیزبوڵا ى لە لوبنانى بەدوادا دێت، چونکە ئەگەر بەسرە لەمشتدا بێت لوبنان و فەلەستین ئەو بایەخەى نامێنێت، ڕەنگە ئەمانە هەموویان خەیالڕ پڵاو بن، بەڵام دەشێ کە زەنگى ئاگادار کردنەوە بن، چونکە بابل کۆرشى فارسى ڕوخاندویەتى لە (539) پێش زایندا و ڕەزا شا دانى بە دەوڵەتى عێراقدا نەناوە لە ساڵى (1929) داو لە دەربارى خۆیدا لە تاران پێشوازى لە فەیسەڵى یەکەم کردووە لە (1932) و دواى ئەوەى کە عەرەبستانى مسۆگەر کردووە، ئەوندە هەیە هەردوو هەریمەکە لە بازنەى مەترسیدان   diyarerad@hotmail.com
سەرچاوە:  ڕۆژنامەى شەرق ئەلئەوسەت-لەندەن

حکومەتى هەرێمى کوردستان ساڵى تازەتان پیرۆز..!
ئا: شێرزاد عەبدوڵڵا قۆڕیتانی

بۆ ساڵی داهاتوو(2007) ئه‌گه‌ر رژیمی کۆماری ئیسلامی ئێران به‌ کرده‌وه‌ پێشی پێ نه‌گیردرێ و پاشه‌کشه‌ی پێ نه‌کرێت، شه‌ڕی نه‌ته‌وه‌یی و مه‌زهه‌بی له‌ عێراق و لوبنان و فه‌له‌ستین(شه‌ڕی براکوژی) و ئیسرائیل و ئه‌فغانستان و پاکستان … به‌وپه‌ڕی خۆی ده‌گات و ئاشتی ناوچه‌ وجیهان ده‌که‌وێته‌ مه‌ترسییه‌کی چاره‌سه‌رنه‌کراو وخه‌فه‌تبارانه.

ئه‌و سێ دێڕه‌ دوا دێڕی وتارێک بوون که‌ بۆ به‌خێرهێنانی ساڵی 2007 نووسرا بوو.
سه‌ره‌تای ساڵی 2008 دێوه‌زمه‌ی ڕه‌ش وخورافات جه‌سته‌ی پاک ونازه‌نینی دێمۆکراسی له‌خوێن گوزاند و شه‌می زایینی عیسای کوژانده‌وه‌ و خونچه‌ی سیمبولی موژده‌ی سه‌رساڵی له‌ داس دا و جێژنانه‌ی زارۆکان ته‌رمی بی گیانی دایکێکی باوک و برا کوژراو بوو.
زۆر به‌ داخه‌وه‌ دوا ڕۆژه‌کانی2007 به‌ تێرۆر ناجوامێرانه‌ی خانمی ،،بێ نه‌زیر بۆتۆ،، نوێنه‌ر و ئاڵاهه‌ڵگری دیمۆکراسی له‌ ئاسیا و به‌ تایبه‌تی له‌ پاکستان دا کۆتایی هات. به‌ بڕوای من پاکستان ساڵیکی سه‌خت و پڕ ئاژاوه‌ و ده‌رد سه‌ری له‌به‌ره‌. ئاگرێک به‌ ده‌ستی خورافات وکۆنه‌ په‌رستی گڕ بدری ، دامرکانی حه‌سته‌مه‌.
له‌ قاره‌ی ئافریقاش دا له‌ ئاکامی هه‌ڵبژاردنی سه‌رۆک کۆماری ئه‌م وڵاته‌، له‌ ئاخرین رۆژی ساڵ دا زیادتر له‌ 100 که‌س کوژران . ده‌بێ به‌ سه‌دانیش بریندار بووبن و نائارامیش به‌رده‌وامه‌ بۆ ساڵی 2008.
به‌ نرخترین دیاری دونیای به‌ ناو دێمۆکرات وپێشکه‌وتوو بۆ نیزامی کۆماری ئیسلامی ئێران، ئازاد کردنی تێرۆریستی ناودار قاتڵی کوشتارگای میکونوس ،، کازم دارابی،، بوو.
که‌ له‌ ساڵرۆژی جارنامه‌ی مافی مرۆڤ دا له‌ پێش چاوی بیرو ڕای گشتی جیهانی ئه‌م گه‌وره‌ تێرۆریسته‌(کازم دارابی)، حوکم دراوی دادگا(میکونوس)ی ره‌سمی ئوروپایی ئازاد ‌کرا. ئه‌م تێرۆریسته‌ له‌ لایه‌ن ده‌وڵه‌تی تێرۆریست په‌روه‌ری کۆماری ئیسلامی ئێرانه‌وه‌ به‌ ره‌سمی وه‌ک پاڵه‌وانی نه‌ته‌وه‌یی و مه‌زهه‌بی پێشوازی لێده‌کرێت، ده‌بێ جیهان و دونیای به‌ناو پێشکه‌وتوو و دێمۆکراسی خواز، چاوه‌ڕوانی ئه‌وه‌ش بکه‌ن که‌ کاندیدای سه‌رۆکۆماری و سه‌رۆک وه‌زیران له‌ لوبنان و پاکستان… تێرۆر بکرێن. ده‌بێ ئه‌وه‌ش بزانن دره‌نگ یا زوو نۆره‌ی خۆشیان دیت. چونکه‌ تیرۆریست و تیرۆریزم به‌ باج وه‌رگرتن رازی نابێت، به‌ڵکو ده‌سه‌ڵاتی ده‌وێت و به‌ مه‌رگی ئازادی و دێمۆکراسی و ته‌مه‌دون تینیویه‌تی خۆی ده‌شکێنێت.
به‌ جێیه‌ خه‌ڵکی جیهان وه‌گومان که‌ون، که‌ کاتێک گه‌وره‌ تیرۆریستێکی ده‌وڵه‌تی مه‌حکومی دادگایه‌کی موعته‌بری ئورووپایی ئازاد ده‌کرێ، پێت وا بێ ئه‌وانه‌ی به‌ناوی شه‌ڕ له‌ گه‌ڵ تێرۆریزم له‌شکریان کێشاوه‌ته‌ سه‌ر عێراق و ئه‌فغانستان، له‌ ئه‌شکه‌وت و په‌ناگایان دا خه‌ڵکی به‌ ناوی تێرۆریست ده‌کوژن و ده‌گرن، بڵێی دژی تیرۆر و تیرۆریست بن!!؟؟
ساڵی 2007 به‌ گشتی له‌ سێ بواری سیاسی، ئابووری و سڵامه‌تی ژینگه‌وه ‌ساڵێکی به‌ پیت و به‌رهه‌م نه‌بوو.
له‌ باری سیاسییه‌وه‌ که‌ بڕوانینه‌ کێشه‌ی به‌ره‌کانی به‌ ناو دێمۆکراسیخوازی و کۆنه‌په‌رستی وخورافاته‌وه. به‌ ئاشکرا ده‌بینین که‌ به‌ره‌ی به‌ناو پێشکه‌وتوو ودێمۆکراسیخواز که‌ به‌ ڕه‌واڵه‌ت زل هێزه‌کانی ئورووپا و ئامریکا و بیر وڕای گشتی مرۆڤدۆستانه‌ی ئه‌م وڵاتانه‌ی ڕێبه‌ری ده‌که‌ن، له‌ به‌رانبه‌ری به‌ره‌ی بونیادگه‌راو دواکه‌وتوودا که‌ سه‌رده‌مدارانی کۆماری ئیسلامی ئێران ڕێبه‌ری و په‌روه‌رده‌ی ده‌کا له‌ درێژه‌ی ساڵی رابردوو دا هه‌ر ڕۆژ له‌ پاشه‌کشه‌ ودۆڕاندن دا بووه‌.
ئازادیخوازان چ وه‌ک تاک و چ وه‌ک کۆڕ و کۆمه‌ڵ و نه‌ته‌وه‌ له‌خوێن گه‌وزاون و به‌ندی و زیندانی، یان سه‌رکوت و بێ به‌ش کراون. به‌ گشتی له‌ زۆر شوێنی ئه‌م جیهانه‌دا بونیادگه‌رایی پاشه‌کشه‌ی به‌ دێمۆکراسی و ئازادی و پێشکه‌وتن کردوه‌. له‌ کاتێکدا هه‌موو خه‌ڵکی جیهان ئه‌وه‌ ده‌زانن که‌ ئه‌گه‌ر سات وسه‌ودای بازرگانی و هێندێک به‌رژه‌وه‌ندی کوێری سیاسی زلهێزه‌کان لێگه‌ڕێ. سه‌رکو‌ت کردنی تێرۆریزم و وشکاندنی سه‌رچاوه‌ی ماڵی زۆر به‌ سانی چاره‌سه‌ر ده‌کرێ.
ده‌وڵه‌تانی گه‌وره‌ی جیهانی به‌تایبه‌تی ده‌وڵه‌تانی(5+1) زۆرتر له‌ قسه‌ و شیعار دا پشتیوانی له‌ ئازادی و دێمۆکراسی ده‌که‌ن و بونیادگه‌رایان به‌ کرده‌وه‌ ئامانج و به‌رنامه‌کانی خۆیان ده‌به‌نه‌ پێش.
ئه‌گه‌ر وه‌ک نموونه‌ دوو ده‌وڵه‌تی ئه‌مریکا و کۆماری ئیسلامی ئێران وه‌به‌ر چاو بگرین. ده‌بینین سه‌ربازان و کاربه‌ده‌ستانی ئامریکایی له‌ ترسی نائه‌منی تیرۆریستان به‌ تایبه‌تی له‌ هیچ جیگایه‌کی ڕۆژهه‌ڵاتی ناوه‌ڕاست دا ئه‌مینیان نییه‌. هیچ ده‌وڵه‌تێکی ناوچه‌ به‌ دڵ پشتیوانی له‌ ئامریکا ناکات و لایه‌نگرانیشیان یه‌ک به‌ دوای یه‌ک دا تێرۆر ده‌کرێن.
له‌ ساڵی رابردوو دا ده‌وڵه‌تی کۆماری ئیسلامی ئێران له‌ ناوچه‌دا بڕیارده‌ره‌ و قسه‌ی ئاخری کردوه‌.
ئه‌م ده‌وڵه‌ته‌ له‌ قاره‌ی ئامریکا له‌ بناگوێی ئامریکا له‌گه‌ڵ ده‌وڵه‌تانی پێرۆ، وینزوئێلا و کۆبا… پیوه‌ندی عه‌قیده‌تی(مه‌کته‌بی ملهوڕی ودیکتاتۆری) و بازرگانی پته‌وی دامه‌زراند و به‌ سه‌دان میلیۆن دۆڵاری بۆ پلانی جۆراوجۆری ئاوه‌دانی و ئابووری پێشکێش به‌ حاکمان ئه‌م وڵاتانه‌ کرد.
له‌ ئاسیا دا شه‌ریکی گه‌وره‌ی مامه‌لاتی له‌ گه‌ڵ وڵاتانی چین و ڕووسیه‌ دامه‌زراند و له‌ به‌رانبه‌ری وڵاتانی رۆژاوایی دا قیتی کردنه‌وه‌. پیوه‌ندی بازرگانی له‌ گه‌ڵ ده‌وڵه‌تانی ئاڵمان و ئیتالیا و ئینگلیس به‌ راده‌یه‌کی باوه‌ڕنه‌کراو برده‌ سه‌ر‌.
له‌ ساڵی2007 دا سیاسه‌تی ئابووری نیزامی ئامریکا له‌ ناوچه‌ و به‌ تایبه‌تی له‌ عێراق دا تووشی شکست هات‌.
یه‌کێک له‌ هۆیه‌کانی ده‌ست له‌ کار کێشانه‌وه‌ی تونی بلێر سه‌رۆک وه‌زیرانی بریتانیا له‌ کاری ده‌وڵه‌تداری و شکه‌ستی سه‌رۆک وه‌زیرانی ئوسترالیا، هۆی شکستیان له‌ عێراق دا بوو که‌ هاوپه‌یمانی ئامریکا بوون.
هه‌ر وه‌ها شکه‌ستی حیزبی جومهوریخوازی بۆش له‌ مه‌جلیسه‌کانی پارلمان و سینا دا ڕاسته‌خۆ ده‌گه‌ڕیته‌وه‌ بۆ ئه‌و شکه‌سته‌. ئینگلیسییه‌کان به‌ سازان له‌ گه‌ڵ حکومه‌تی ئێران پارێزگای به‌سه‌ره‌یان ته‌حویلی شیعه‌کان دا و وڵاتانی دیکه‌ش یه‌ک له‌دوای یه‌ک سه‌ربازه‌کانیان له‌ عێراق کێشایه‌وه‌، یان ده‌کێشنه‌وه‌.

ده‌وڵه‌تی ئامریکا که‌ زۆر جار ده‌وڵه‌تی ئێرانی به‌ ته‌وه‌ره‌ی شه‌راره‌ت داده‌نا، له‌ ساڵی چوودا له‌ به‌غدا دووجار دانیشتنی بی سه‌مه‌ری له‌گه‌ڵدا کردوه‌. ئێستاش داخوازه‌ هه‌ر کات ئێران بیهه‌وێ و له‌ هه‌ر جێگایه‌ک بخوازێ ئاماده‌یه‌ له‌ گه‌ڵی دابنێشێ(سازش بکات.
گه‌وره‌ کردنه‌وه‌ی مه‌سه‌له‌ی سازکردنی چه‌کی ئه‌تۆمی ئێران که‌ ناوچه‌ودنیای خستۆته‌ مه‌ترسییه‌وه‌ و ئه‌وه‌ چه‌ندین ساڵه‌ بۆته‌ مه‌شغه‌ڵه‌ی ڕێکخراوی نه‌ته‌وه‌یه‌کگرتوه‌کان وده‌وڵه‌تانی ڕۆژاوایی و یه‌کیتی ئوروپاو ئاژانسی نێونه‌ته‌وه‌یی وزه‌ی ئاتۆمی، له‌ کاتێکدا ده‌وڵه‌تانی (5+1) و یه‌کێتی ئورۆپا و شۆرای ئه‌منییه‌ت و ئاژانس له‌ سه‌ر ئه‌وه‌ سوور بوون که‌ ،،ته‌حریم،،ی سیهه‌م بخه‌نه‌ سه‌ر حکومه‌تی ئێران، به‌ به‌یانییه‌کی ده‌زگای ئه‌منییه‌تی میللی ئامریکا(CIA)، که‌ گۆیا له‌ ساڵی 2003 وه‌ ئێران ده‌ستی له‌ سازکردنی چه‌کی ئاتۆمی هه‌ڵگرتوه‌، هه‌ر وا دێت ئه‌و مه‌ترسییه‌ وه‌پاش گوێ بخرێت. ئه‌وه‌ش گومانێکی دیکه‌ ده‌خاته‌روو که‌ ئه‌م ده‌زگایه‌ بۆچی له‌ ماوه‌ ئه‌م سی ساڵه‌دا ئه‌و ڕاپۆرته‌ی لانی که‌م به‌ سه‌رۆکی حکومه‌تی وڵاته‌که‌ی نه‌داوه ‌و ئه‌و هه‌مووه‌ شه‌خسی سه‌رۆککۆماری تووشی سه‌رئێشه‌ کردوه‌.

له‌ ساڵی رابردوو دا کۆماری ئیسلامی ئێران له‌ هیچکام له‌ به‌ره‌کانی دژایه‌تی له‌گه‌ڵ ڕۆژاوا و شه‌ڕ له‌ گه‌ڵ ره‌وتی دێمۆکراسی و ئازادیخوازان نه‌ک هه‌ر پاشه‌کشه‌ی پێ نه‌کراوه‌‌، بگره‌ سه‌نگه‌ر به‌ سه‌نگه‌ر چۆته‌ پێشه‌وه‌.
هه‌تا ئه‌و جێگایه‌ نرخی بۆشکه‌ نه‌وتێکی له‌ 60 دۆڵاره‌وه‌ گه‌یاندۆته‌ 100 دۆلار. هه‌ر به‌م پارانه‌ش ماتۆری تیرۆر و تیرۆریست په‌روه‌ری گه‌یانده‌‌ پله‌ی‌ دڵخوازی خۆی و بۆته‌ بڕیارده‌ری ناوچه‌.
ئه‌و ساڵیش ده‌وڵه‌تی ئیسرائیل به‌ دوای شه‌ری 33 ڕۆژه‌ی هاوینی 2006 به‌ تکای ده‌وڵه‌تانی ئوروپایی وعه‌ره‌بییه‌وه‌ نه‌یتوانی،‌ تاقه‌ سه‌ربازێکی به‌ دیل گیراوی ده‌ستی حیزبوڵڵا ئازاد بکات.
دیاره‌ له‌م ساڵه‌شدا وه‌ک ساڵانی رابردوو هه‌موو ده‌وڵه‌تانی مامه‌له‌گه‌ری جیهان له‌م بازاره‌ ئاشوفته‌یه،‌ به‌شی خۆیان هه‌ڵگرت. به‌تایبه‌تی شه‌ریکه‌ نه‌وتییه‌کانی جیهان که‌ ئاغای ئه‌حمه‌دی نه‌ژاد بۆیان بوو به‌ سه‌رچاوه‌ی رزق رۆژی‌. چین و رووسیه‌ له‌م باره‌وه‌ هه‌م له‌ رووی سیاسی و هه‌م له‌ ڕووی ئابوورییه‌وه‌ باشترین که‌ڵک و به‌رهه‌میان وه‌ده‌ست هێنا و سه‌رپشکی خۆیان له‌ حه‌ریفان ئه‌ستاند.
ده‌وڵه‌تی رووسیه‌ به‌ دوای به‌یانییه‌ی ده‌زگای ئه‌منییه‌تی میللی ئامریکا که‌ وێده‌چوو ڕیگا خۆشکه‌ری سازشی ئاشکرای ئێران و ئامریکا بێت. به‌ په‌له‌ له‌ کۆتاییه‌کانی مانگی دێسامبیر دا به‌ دوو که‌ڕه‌ت سوختی ئاتۆمی ده‌زگای بوشه‌هری (80 تۆن) ته‌حویلی ئێران داو بازاڕه‌که‌ی بۆ هه‌میشه‌ ده‌ست به‌سه‌ر کرد‌. به‌ یه‌قین ئه‌م مامه‌له‌ ونزیکایه‌تییه‌ به‌ دڵی ڕۆژاوا وئامریکا نییه‌.

ئێران:
ده‌وڵه‌تی ئێران ئه‌وه‌نده‌ی له‌ په‌ره‌پێدانی نائه‌منی ناوچه‌ و خزمه‌ت به‌دام و ده‌زگا و ڕیکخراوه‌ تێرۆریست و ئاژاوه‌ گێره‌کان و سه‌رکوتی ئازادیخوازانی ناوخۆیی و ده‌ره‌وه‌ دا سه‌رکه‌وتوو بوو، هه‌ر ئه‌وه‌نده‌ش له‌ خزمه‌ت به‌ خه‌ڵکی ئێران و وڵاتی ئێران دا ناسه‌رکه‌وتووبوو‌.
رژیم ته‌نیا کار بۆ مانه‌وه‌ی خۆی ده‌کات. بۆ ئه‌و مانه‌وه‌ش ئاماده‌یه‌ هه‌موو باجێک بدات. مه‌عامه‌لاتی میلیاردی له‌ گه‌ڵ پۆتینی رووسی و به‌خشینی‌ زیادتر له‌ 100000 کیلۆ میتری چوار گۆشه به‌ رووسه‌کان‌ له‌ ئاو و خاکی ده‌ریای مازنده‌ران که‌ سه‌رچاوه‌ و مه‌عدنی له‌بن نه‌هاتووی شێلات و گه‌شتوگوزار و نه‌وت و گازه‌،‌ گه‌وره‌ترین خه‌یانه‌ت به‌ ته‌واوییه‌ت ئه‌رزی وڵات و نه‌وه‌کانی داهاتوو کرد‌.
فه‌سادی ماڵی. ئاوسانی دراوی ، بیکاری و ئیعتیاد و نه‌خۆشییه‌کانی واگیر ، ته‌ڵاق ، ئاوسانی ئابووری به‌ راده‌ی نزیک به‌ 20% وه‌ک به‌ڵا و موسیبه‌تی ئاسمانی یه‌خه‌گیری خه‌ڵکی ئیرانن. به‌ راپۆتی باوه‌رپێکراوان نزیک به‌ یه‌ک له‌ ده‌ی خه‌ڵکی ئێران له‌ ژێر خه‌تی هه‌ژاری دا ده‌ژین به‌ تایبه‌تی له‌ ئوستانه‌کانی سیستان و به‌لوچیستان.

له‌ ئێرانی کانگای نه‌وت و گاز له‌م چله‌ی زستانه‌ دا خه‌ڵکی بێ نه‌وت و گاز به‌ سه‌ختترین شێوه‌ی‌ نیوه‌ژیان، ژیان ده‌به‌نه‌سه‌ر.
داروی میللی ئێران هه‌م له‌ ژووره‌وه‌ وهه‌م له‌ ده‌ره‌وه‌ هیچ باییخ و بره‌وێکی نه‌بوو‌. به‌ پێی به‌راوه‌ردی بانکی میللی ئێران 1000 تمه‌نی ئیستا باییخی 3 تمه‌نی و پێنج قرانی ساڵی 1357 ی هه‌یه‌.
داشکانی بازاری بورس له‌ ئێران سه‌رسام هێنه‌ر بوو و خه‌ڵکی تووشی زه‌ره‌ر و زیانێکی زۆر کرد.
هه‌ر به‌ پێی راپۆرتی کاربه‌ده‌ستانی باوه‌ڕپێکراوی ڕژیم له‌م ساڵه‌دا نزیک به‌ 95 میلیارد دۆڵاری داهاتی ئێران بێ سه‌رو شوێن کراوه‌. ئه‌وه‌نده‌ی خه‌رجیش کراوه‌، که‌س نازانێ بۆ چی بووه‌ وله‌ چ ڕیگایه‌کدا خه‌رج کراوه‌ و چی به‌سه‌ر هاتوه‌. ساڵی2007 ساڵی داخستنی چاپه‌مه‌نی وگرتنی و سه‌رکوتی ڕۆژنامه‌گه‌ران و ئازادیخوازان، به‌ تایبه‌تی خوێندکارانی زانکۆکان بوو. ده‌کرێ ساڵی 2007 له‌ ئێران دا به‌ ساڵی بی قانوونی و ساڵی به‌ تاڵان چوونی سه‌روه‌ت و ئاو و خاکی ئێران ناودێر بکرێت.

هه‌ر چه‌ند هه‌ڵسو که‌وتی سه‌رده‌مدارانی رژیم به‌ گشتی و به‌ تایبه‌تی سه‌رۆککۆمار ئاغای ئه‌حمه‌دی نه‌ژاد له‌ گه‌ڵ هیچ عورفێکی دیپڵۆماسی دونیای ئه‌مرۆکه‌ نایه‌ته‌وه‌ و دۆنیاش له‌ وته‌کانی و ئاکاره‌کانی رژیم بێزاره. به‌ڵام له‌م ساڵه‌شدا ئه‌و گشته‌ بێزاریانه‌ قه‌ت نه‌بوون به‌ هێزێکی مادی و یه‌کگرتوو له‌ خزمه‌تی کۆمه‌لگای جیهان و ئێراندا، هه‌تا بتوانن به‌ یاری گه‌لانی ئێران ئه‌م رژیم بگۆڕن.‌ بی ده‌نگی جیهانی له‌ ڕاست ئه‌و هه‌موو هه‌ره‌شه‌ وگیرو گرفت و شر وکێشه‌ و ئاژاوانه‌ی له‌ ناوچه‌دا خوڵقاندی، رژیمی چه‌نه‌ ئه‌وه‌نده‌ سه‌ره‌ڕۆتر و هارتر کردوه‌. چی خواست کردی و چی بخوازێ کوتی.

له‌ یه‌ک وشه‌دا رژیمی ئێستای ئێران له‌ ساڵی رابردووشدا وه‌ک ساڵانی دیکه‌ یانی: بێ سوباتی ونائه‌منی له‌ ناوجه‌ و جیهان و سه‌رچاوه‌ی تێرۆریزم.

کوردستان:
کوردستانی ئێراق له‌م ساڵه‌ دا ته‌نیا توانیویه‌تی ره‌واڵه‌تی خۆی ڕاگرێ و هیچ جه‌شنه‌ ده‌سکه‌وت و سه‌رکه‌وتنێکی وه‌ده‌ست نه‌هێناوه. ماده‌ی 140 که‌ ده‌بوا له‌ ساڵی 2007 دا جێ به‌جێ بکرێ، هه‌ر وه‌ک خۆی مایه‌وه‌. نه‌ک هه‌ر عه‌ره‌به‌ هاورده‌کانی ده‌ورانی حکومه‌تی سه‌دام له‌ کوردستان نه‌گه‌ڕانه‌وه‌ و کورده‌ ئاواره‌کانیش نه‌بردرانه‌وه‌ سه‌ر زێدی خۆیان، به‌ڵکو به‌ هه‌زارن بنه‌ماله‌ی مل ئه‌ستوور وگومان لێکراوی عه‌ره‌ب به‌ بیانووی نائه‌منی ناوچه‌ عه‌ره‌ب نشینه‌کان ده‌کوردستان خزان و بۆ هه‌میشه‌ جیگای خۆیان خۆش کردوه‌. که‌ ئه‌وه‌ش ده‌بیته‌ گرفتێکی چاره‌سه‌ر نه‌کراو بۆ داهاتووی کردستان.
‌ئه‌م ساڵ به‌ شێوه‌یه‌کی به‌رچاو ، تێرۆر و نائه‌منی گوێزرایه‌وه‌‌ کوردستان به‌ تایبه‌تی ناوچه‌کانی موسڵ و خانه‌قین.
هێرشی هه‌وایی و زه‌مینی ئێران وتورکیه‌ بۆ سه‌ر خاکی هه‌رێمی کوردستان وای لیهاتوه‌ بۆته‌ مه‌شقی ڕۆژانه‌.
هه‌تا ئێستاش هیچکام له‌ ده‌وڵه‌تانی جیهان ته‌نانه‌ت ده‌وله‌تی ئامریکا و ئێراقیش که‌ سه‌رۆک کۆماره‌که‌ی کورده‌،‌ ئه‌م هێرشانه‌یان به‌ ره‌سمی مه‌حکوم نه‌کردوون.

قه‌راردادی شومی ئه‌لجه‌زایر:

بۆ دونیا به‌ گشتی و بۆ کورد به‌ تایبه‌تی، جێی داخ وسه‌رسوڕمان بوو که‌ له‌ دوارۆژه‌کانی ئه‌م ساڵ دا سه‌رۆک کۆماری کوردی ئێراق(تاله‌بانی) قه‌راردادی 1975ی ئه‌لجه‌زایر که‌ له‌سه‌ر که‌وڵی کورد نووسراوه‌ و به‌ خوێنی کورد ئیمزا کراوه و دوای 5 سال له‌ لایه‌ن سه‌رۆککۆماری ئێراق سه‌دام حوسێن ره‌ت کراوه‌ته‌وه‌، دوای 33 ساڵ وه‌ره‌سمیه‌تی خسته‌وه‌‌.
قه‌رار دادی ئه‌لجه‌زایر به‌م ده‌لیلانه‌ی خواره‌وه‌ هیچ ئیعتبارێکی قانوونی نه‌ماوه‌.
یه‌که‌م: ئه‌م قه‌رارداده‌ له‌‌ کاتی ده‌سته‌لاتی حیزبی ،،به‌عس،، به‌ سه‌رۆکایه‌تی ئه‌لبه‌کر و سه‌دام حوسێن له‌ ئێراق و نیزامی شاهه‌نشاهی به‌ پاشایه‌تی مه‌حه‌مه‌د ره‌زاشا له‌ ئێران به‌ستراوه‌.
دووهه‌م: ئه‌م قه‌رارداده‌ کاتی خۆی ته‌نیا له‌ لایه‌ن دوو وه‌زیری ده‌ره‌وه‌ی ئه‌م دوو وڵاته‌ ،،سه‌عدون حه‌مادی،، و ،،عه‌باسعه‌لی خه‌لعه‌تبه‌ری،، ئیمزا کراوه‌.
سێهه‌م: ئه‌م قه‌رارداده‌ نه‌ به‌ ئیمزای سه‌رۆکی وڵات بووه‌.نه‌ به‌ ئیمزای سه‌رۆکی پارڵمان، نه‌ به‌ په‌سه‌ندی پارڵمان ومه‌جلیسی وڵات‌.
قه‌راردادی شومی ئه‌لجه‌زایر به‌ به‌های فیدا کردنی شۆرشی نه‌ته‌وه‌یه‌ک پێکهاتوه‌ که‌ یه‌ک له‌سێی خه‌لک وخاکی ئێراق پێک دێنێ. و له‌ کاتی خۆشی لایه‌ن حاکمی وه‌خت(1975) سه‌دام حوسێن له‌ ساڵی 1981 دا که‌ دوایی بۆته‌ سه‌رۆککوماری ئێراق به‌ره‌سمی له‌سه‌ر شاشه‌ی ته‌له‌‌فیزیۆنی ده‌وڵه‌تی ئێراق له‌ پێش چاوی ده‌و‌ڵه‌تان وبیر وڕای جیهانی هه‌ڵوه‌شاوه‌ته‌وه‌.
هیچکام له‌ نیزامه‌کانی حکومه‌تی ئێستای ئێران وئیراق دوو نیزامی پێشوو(به‌عس و سه‌لته‌نه‌ت) به‌ ره‌سمی ناناسن و له‌ هه‌ر دووک وڵات سه‌رۆک وده‌وڵه‌ت و کاربه‌ده‌ستانی ئه‌م نیزامانه‌ به‌ ئیعدام مه‌حکوم کراون. سه‌رۆکوه‌زیرانی ده‌ورانی قه‌رادادی ئه‌لجه‌زایری له‌ ئێران ئاغای،، ئه‌میر عه‌باسی هووه‌یدا،، له‌ گه‌ڵ چه‌ندین وه‌زیری کابینه‌کانی ده‌وڵه‌تی شاهه‌نشاهی ئیعژام کران وئه‌وانی دیکه‌ش به‌ گشتی هه‌ر چه‌ند په‌نا به‌ری وڵاتانی دیکه‌ بوون مه‌حکوم به‌ ئیعدامن.

له‌ ئیراقیش سه‌دام و کابینه‌که‌ی مه‌حکوم به‌ ئیعدامن وخودی،، سه‌ددام،،یش هه‌ر له‌ لایه‌ن ئه‌م ده‌وله‌تی ئێستاوه‌ ئیعدام کراوه‌. حیزبی،،به‌عس،،یش غیره‌ قانوونی کراوه‌ و چالاکی له‌م حیزبه‌ دا تاوانی له‌ دار دانه‌.
هه‌موو دامو ده‌زگای سه‌ر به‌ نیزامی به‌عسی له‌ ئه‌رته‌ش و پۆلیس و موخابه‌رات و دام وده‌زگای ئیداری و ….. هه‌ڵوه‌شانه‌وه‌ و له‌ کار لابراون.
کاتێک بوونی ئه‌م نیزامانه‌ و سه‌رۆک و ده‌وڵه‌ت و کاربه‌ده‌ستانی ئه‌م نیزامانه‌ به‌ نامه‌شروع وخایین وتاوانبار ده‌ناسرێن ومه‌حکوم به‌ ئیعدام ده‌کرێن وله‌ دار ده‌درێن ، چۆنه‌ قه‌راداده‌ دژی گه‌لیه‌کانیان به‌ ره‌سمی ده‌ناسرێن!!؟؟
به‌ بروای من له‌م باره‌وه‌ ئاغای،، تاڵه‌بانی،، که‌ ئه‌م قه‌رارداده‌ی زیندوو ده‌کاته‌وه‌ و ره‌سمییه‌ت و مه‌شرووعییه‌تی پی ده‌دات، له‌ خه‌یانه‌ت به‌ خاکی ئێراق و خاک و نه‌ته‌وه‌ی کورد به‌‌و لاوه‌ شتێکی دیکه‌ نابێ

ته‌جاوه‌ز وحورمه‌ت شکێنی خاک و سه‌روه‌ری کوردستان:

ته‌جاوه‌زی زه‌مینی و هه‌وایی ئێران و تورکیه‌ بۆ سه‌ر هه‌رێمی کوردستان، له‌ واقیع دا بۆ سه‌ر خاکی وڵاتی عیراق ته‌جاوه‌زێکی ئاشکرا و له‌ژێر پێ نانی سه‌روه‌ری وڵاتێکی سه‌ربه‌خۆیه‌.
ئه‌گه‌ر دونیا له‌ ڕاست هه‌ڕه‌شه‌کانی سه‌ر زاره‌کی سه‌رده‌مدارانی ئێران له‌ وڵاتی ئیسرائیل وه‌ده‌نگ دێن و ئه‌م هه‌ره‌شانه‌ به‌ مه‌ترسی ده‌زانن و مه‌حکومی ده‌که‌ن. ئه‌دی چۆنه‌ له‌ ڕاست عه‌مه‌لیاتی تۆپخانه‌ وبۆمبارانی فرۆکه‌ جه‌نگیه‌کانی تورکیه‌ و ئێران و تیرۆر وده‌خاله‌ته‌کانی ئه‌و دوو حکومه‌تانه‌ له‌ کوردستان وئێراق دا گوێی خۆیان خه‌واندوه‌ و چاوی خۆیان نوقاندوه‌. ئه‌وه‌ش سیاسه‌ت وهه‌ڵوێستی عه‌رب وئامریکا بوو، له‌ ڕاست دوو حکومه‌تی دراوسییه‌ دژ به‌ کوردی ئێران و تورکیه‌.

ته‌نانه‌ت ده‌وله‌تی ئامریکا که‌ پارێزه‌ری نیزامی و ئه‌منییه‌تی عێراقی به‌ئه‌ستۆوه‌یه‌ و نزیک به‌ 150000 سه‌ربازی له‌ عێراق مۆڵداوه و سه‌رۆک کۆماری عیراق و وه‌زیری ده‌ره‌وه‌ی عێراق و به‌شێکی زۆر له‌ معاوه‌نانی سه‌رۆک کۆمار و سه‌رۆک وه‌زیران که‌ به‌ ره‌گه‌ز کوردن له‌ ڕاست ئه‌م هێرشانه‌ هیچ هه‌ڵوێستێکی شه‌رافه‌تمه‌ندانه‌یان نه‌بووه‌.

کوردستانی ئێران:
له‌ کوردستانی ئێران وه‌زعی خه‌ڵک هه‌ر وه‌ک‌ ساڵانی رابردووی ژێر ده‌سته‌ڵاتی نیزامی کۆماری ئیسلامی له‌ چه‌وسانه‌وه‌ و ته‌نگانه‌ دابوون. بێکاری ، گرانی، ئیعتیاد، ناسڵامه‌تی ، نائه‌منی ، کوشت وبگیر و داخستنی رۆژنامه‌ و گۆڤار و گرتنی رۆژنامه‌وانان و زیندانی کردنی نووسران و ئازادیخوازن به‌وپه‌ڕی خۆیه‌وه‌ به‌رده‌وام بووه‌.

ته‌دریسی خورافات له‌ خوێندگه‌ وزانکۆکان په‌روه‌رده‌کردنی مرۆڤی خورافاتی وپێک هێنانی سوپای به‌سیجی به‌ خواهیش وبه‌زۆری شێوه‌ کار وسیاسه‌تی نیزامی کۆماری ئیسلامی ئێران بووه‌ له‌ کوللی ئێران به‌ گشت‌تی وله‌ کوردستان به‌تایبه‌تی.

هێزه‌ سیاسییه‌کانی کورد له‌م به‌شه‌ له‌ ساڵی رابردوودا به‌ داخه‌وه‌ و به‌ پێچه‌وانه‌ی ویستی هه‌موو خه‌ڵکی کوردستان ودۆستانی کورد که‌ یه‌کگرتن و هاوکاری بوو، تووشی قه‌یران و لێکدابران هاتن. له‌ جیاتی له‌ دژی دوژمن و داگیرکه‌ر خه‌بات بکه‌ن، بوونه‌ ئوپوزیسیۆن یه‌کتر.

له‌ لایه‌کی دیکه‌ش چونکه‌ ئه‌م ‌هێزانه‌ له‌ ته‌بعید و له‌ ژێر چاوه‌دێری دوو حیزبی سه‌ره‌کی کوردستانی عێراق (یه‌کیه‌تی و پارتی) دان. ناڕاسته‌وخۆ که‌وتوونه‌ته‌ ژێر کۆنترۆڵی نیزامی کۆماری ئیسلامی ئێران، یا باشتر و ڕوونتر بڵێین که‌توونه‌ته‌ دۆخی چه‌ک دانان. هه‌ر چه‌ند گه‌لانی ئازادیخوازی کوردستانی ئێران تواناو کاپاسیته‌ی ڕاپه‌ڕینێکی به‌ هێز وسه‌رانسه‌ریان هه‌یه‌ و به‌ کرده‌وه‌ش له‌ هاوینی ساڵی 2005 دا نیشانیان دا. به‌ڵام هه‌ر چاوه‌ڕوانی هه‌ڵوێست و خه‌باتی حیزبه‌ سه‌ره‌کییه‌کانی ئه‌م به‌شه‌ن. له‌م باره‌وه‌ کۆماری ئیسلامی ئێران هه‌تا ئێستا توانیویه‌تی دینامیزمی ئه‌م ڕاپه‌ڕینه‌ له‌ کار بخات.

هه‌ر له‌م به‌شه‌ به‌ ناو چه‌ندین ڕێکخراوی میحفه‌لی و تاکه‌ که‌سی سازدراون و ته‌نانه‌ت ڕژیم توانیویه‌تی بونیاتی ڕێکخراوێکی ئیسلامی مه‌زهه‌بی دابڕێژێ که‌ ببێته‌ پارسه‌نگ و مۆته‌که‌ی بیری نه‌ته‌وه‌خوازی و ئازادیخوازی و مۆدیرنیته‌ له‌ کوردستان دا. ئه‌م جۆره‌ ڕێکخراوانه‌ش ده‌بنه‌ په‌تایه‌کی کوشه‌نده‌ بۆ دواڕۆژی خه‌باتی ڕه‌وای کورد به‌ گشتی.

به‌ڵام که‌یس وحیسابی دوو به‌شی جیابۆوه‌ له‌ حیزبی دێمۆکراتی کوردستانی ئێران و کۆمه‌له‌ی شۆرشگێری زه‌حمه‌تکێشانی کوردستانی ئێران له‌ که‌یس وحیسابی ئه‌م جۆره‌ ڕێکخراوانه‌ جیایه‌.

ئه‌م دوو به‌شی جیا بۆوه‌ که‌ به ‌نارازی بوون له‌ سیاسه‌ت و هه‌ڵوێستی ڕیبه‌رایه‌تی ئه‌م حیزبانه‌ له‌ ساڵی رابردوو (6/12/2006 و هاوینی 2007) ئه‌م دوو حیزبانه‌یان له‌ت کردن و ناوی خۆیان نا،،ره‌وتی رێفۆرم و گه‌شه‌ کردن و چاکسازی و نوێبوونه،، ئه‌وه‌ بێ ئینسافانه‌ ماوه‌ی ساڵێکه‌ خه‌ڵکیان له‌ چاوروانی داڕاگرتوه‌، هه‌تا بزانن که‌نگێ ئیعلانی خه‌باتێکی سه‌رانسه‌ری مۆدێرن و مه‌ده‌نیانه‌ و سه‌رده‌مییانه‌ ده‌ده‌ن و نیزامی ولایه‌تی فه‌قیهی ته‌رت و تونا ده‌که‌ن و له‌ سه‌هۆلبه‌ندانی زستاندا موژده‌ی به‌هاری ئازادی دێنن.

کوردستانی تورکیه:

کورد له‌ کوردستانی تورکیه‌ سه‌ره‌رای ئه‌وه‌ 25 نوێنه‌ری به‌ناو کوردی له‌ پارلمانی تورکیه‌دا هه‌یه‌، به‌ڵام هه‌ر وا له‌ باری سیاسی وکولتوری و مافی نه‌ته‌وه‌ییه‌وه‌ ده‌چه‌وسێته‌وه. ساڵی 2007 ده‌وڵه‌تی تورکیه، نه‌ک هه‌ر له‌ناو خاکی به‌ناو تورکیه‌ دا به‌ڵکو له‌ سنووره‌کانی ده‌ره‌وه‌ی ئه‌م وڵاته‌ش، کوردی خسته‌ به‌ر په‌لامار وهێرش وزه‌ره‌ر و زیانی ماڵی و ره‌وانی گه‌وره‌ و گرانی له‌ کورد و کوردستان دا.
له‌ تورکیه‌ نزیک به‌ 90 ساڵ دوای دامه‌زرانی نیزامی دژی گه‌لی و کورد کوژی ئاتاتورک، تابوی ئه‌م نیزامه‌ ده‌شکێ و نیزامێکی ئیسلامی و غیره‌ سێکولار دێته‌ سه‌رکار، که‌ له‌باری جیهان بینییه‌وه‌ ده‌که‌ویته‌ خانه‌ی نیزامی کۆماری ئیسلامی ئێران. ئه‌و هاوخانه‌ بوونه‌ش به‌ کرده‌وه‌ و هاوزه‌مان به‌ تۆپباران و بۆمباران و کوشتن و سه‌رکوت کردنی کورد و کوردستان ڕووی دژی ئازادی ودژی ئاشتی وئه‌منییه‌تی له‌ کوردستان و ناوچه دا به‌ کورد وجیهانیان نیشان دا.
لانی که‌می که‌ تورکیه‌ له‌ په‌یمانی ناتۆ دایه‌ و به‌ درێژایی 70 ساڵ شه‌ڕی گه‌رم وساردی ڕۆژاوا و ڕۆژهه‌ڵات پارێزراوه‌. هێرش بۆ سه‌ر کوردستان ڕاست هێرش بۆ سه‌ر مه‌سڵه‌حه‌ت و وڵاتی ژێر په‌یمان و چاوه‌دێری ناتۆیه‌.
جێ سه‌ر سۆڕمانه‌ که‌ ئامریکا ده‌مڕاست ئه‌م په‌یمانه‌، که‌ وڵاتی عێراقیش له‌ ژێر هێز و چاوه‌دێری ئه‌و دایه‌، رازی به‌م هێرشانه‌یه‌. که‌ له‌م باره‌وه‌ به‌ کرده‌وه‌ ده‌که‌وێته‌خانه‌ی کۆماری ئیسلامییه‌وه‌.

سه‌فه‌ری تایبه‌تی ئاغای نووری مالکی بۆ ئانکارا به‌ بی ئاگاداری سه‌رۆک کۆمار و وه‌زیری ده‌ره‌وه عێراق له‌ هاوینی ربردوو دا و هاوکاری ئۆپراسیۆنی نیزامی ئیران و تورکیه‌ و بی ده‌نگی عێراق و ره‌زایه‌تی ئامریکا له‌سه‌ر ئه‌م ده‌خاله‌ت وعه‌مه‌لیاته‌ نیزامییانه‌، راست زیندوو کردنه‌وه‌ و به‌ره‌سمیه‌ت ناسینی په‌یمانه‌کانی،،سه‌عداباد،، و ،،سێنتۆ،،یه‌ که‌ کاتی خۆی له‌ سییه‌کاندا به‌ دژی جۆلانه‌وه‌ی کورد له‌ نیوان حکومه‌ته‌کانی ئێران وتورکیه‌ وعیراق و ئینگلستان(ئامریکا) و ئه‌فغانستان به‌سترابوو.

زیندوو کردنه‌وه‌ و وه‌ڕه‌سمییه‌ت خستنه‌وه‌ی په‌یمانی مردوو وهه‌ڵوه‌شاوه‌ی ئه‌لجه‌زایریش له‌ لایه‌ن به‌ڕیز تاله‌بانی‌ سه‌رۆک کۆماری به‌ ره‌گه‌ز کوردی عێراق له‌ دریژه‌ی ئه‌م سیناریۆیه‌ دایه‌.

به‌ پێێ ئه‌م په‌یمانه‌ ده‌بێ به‌درێژایی سنووری ده‌ستکردی عێراق و ئێران که‌ خاکی کوردستان ده‌گرێته‌وه‌، له‌ هه‌ردووک دیو به‌ قوڵایی 20 کیلۆمه‌تری جوارگۆشه‌ چۆل بکرێت وببێته‌ ناوچه‌ی ،،موحره‌مه‌،،. ئه‌م سنووره‌ش له‌ سه‌رووی ئه‌هوازه‌وه‌ ده‌ست پیده‌کات و هه‌تا ده‌گاته‌ سێ سنوور،،کیوی دالانپه‌ڕ،،. به‌م پێه‌ ده‌بێ نزیک به40000 کیلۆمه‌تری چوارگۆشه‌‌ له‌ خاکی کوردستان چۆل بکرێت. که نزیک به‌ دوو به‌رابه‌ری خاکی ،،ئیسرائیل و کوه‌یت،، وجوار به‌رابه‌ری خاکی ،،لوبنان و قه‌ته‌ر،، و به‌ قه‌را خاکی،،دانیمارک و سویس،، و زیادتر له‌ 40 وڵاتی سه‌ربه‌خۆی جیهانه‌‌.

به‌ڕێز عه‌بدوڵڵا ئۆجه‌لان و PKK

له‌ کۆتایی ساڵی 2007 دا به‌ ڕیز ،،ئۆجه‌لان،،له‌ گرتووخانه‌ی ،،ئیمرالی،،یه‌وه‌ له‌ سه‌ر ڕێگاچاره‌ی پرسی کورد پێشنیارێکی سه‌رنجڕاکێشی پێشکه شى نیزامی ئاخوندی ئێران کرد،‌ که‌ له‌ لایه‌ن ڕیبه‌رایه‌تی pkk وه‌ به‌ڕه‌سمی بڵاو کرایه‌وه‌ و هیچ جێگای شک وگومانی نه‌هێشته‌وه‌ که‌ ئه‌م پێشنیاره‌ ده‌ستکرد بێت و ئاغای ئۆجه‌لان ئاگاداری نه‌بووبێت.
به‌ڕیزیان داواکارن که‌ له‌گه‌ڵ دوو حکومه‌تی کوردکوژی و ئازادی خنکێنی ئاخوندی ئێران و عه‌له‌وی سوریا په‌یمانی ،،کورد – شیعه‌،، ببه‌ستی و بچیته‌ شه‌ڕی حکومه‌تی هه‌رێمی کوردستان و ئامریکا و ئینگلیس ودونیای ڕۆژائاوا.
بۆ ئه‌م هاوپه‌یمانییه‌ش ئاماده‌یه‌ 100000 چه‌کداری کورد ته‌حویلی سوپای قودسی ئێران بدات.
ده‌بێ ئاغای ئۆجه‌لان مه‌به‌ستی له‌و به‌سیجییانه‌ بێت که‌ له‌ ئێران به‌ خواهیش، یان به‌زۆری چه‌کدار ده‌کرێن.
ده‌نا له‌م 100000 چه‌کداره‌ 5000 بباته‌ ئانکاراو ئیستانبوڵ و ئیزمیر به‌ مانگێکی تورکیه‌ ده‌شێوێ و حکومه‌تی تورکیه‌ ده‌ڕوخێ و ده‌توانێ بۆ خۆی له‌ جێی ئاتاتورک دانیشێت
———-
بابەتی لاپەڕە دووی ژمارە ٢٨ کانوونی دووه‌م ٢٠٠٨

Entry filed under: Uncategorized. Tags: .

گەندەڵى ڤایرۆسێکە کوردستان دەکوژێت

پاسخی بگذارید

در پایین مشخصات خود را پر کنید یا برای ورود روی شمایل‌ها کلیک نمایید:

نشان‌وارهٔ وردپرس.کام

شما در حال بیان دیدگاه با حساب کاربری WordPress.com خود هستید. بیرون رفتن / تغییر دادن )

تصویر توییتر

شما در حال بیان دیدگاه با حساب کاربری Twitter خود هستید. بیرون رفتن / تغییر دادن )

عکس فیسبوک

شما در حال بیان دیدگاه با حساب کاربری Facebook خود هستید. بیرون رفتن / تغییر دادن )

عکس گوگل+

شما در حال بیان دیدگاه با حساب کاربری Google+ خود هستید. بیرون رفتن / تغییر دادن )

درحال اتصال به %s

Trackback this post  |  Subscribe to the comments via RSS Feed


گاه‌شمار

اوت 2009
M T W T F S S
     
 12
3456789
10111213141516
17181920212223
24252627282930
31  

Most Recent Posts


%d وب‌نوشت‌نویس این را دوست دارند: